Tge è la biodiversitad?

La biodiversitad è la varietad da la vita. Ella è sa sviluppada sur milliardas onns e cumpiglia tut las spezias da plantas e d'animals sco er ils ecosistems. La biodiversitad è per nus existenziala – pertge ch'ella procura per aua schubra, nutriment, oxigen, substanzas activas medicinalas e porscha a nus spazi da recreaziun.

Perditas dramaticas

La varietad da las spezias è periclitada. Il motiv principal per la spariziun da spezias sin l'entir mund è la perdita da spazis da viver ecologics. La Svizra fitg surbajegiada è particularmain pertutgada en cumparegliaziun internaziunala. Var 40 pertschient da tut las spezias da mammals e d'utschels che vegnan avant qua en la natira valan sco periclitads, tar ils reptils èsi schizunt 79 pertschient. E bunamain mintga terza planta da flur figurescha en il fratemp sin la glista cotschna da las spezias periclitadas.

Relevanza

En il rom da la strategia naziunala «Biodiversitad Svizra» ha il Cussegl federal lantschà il 2017 il «plan d'acziun biodiversitad».

Per cuntanscher questa finamira sto dentant capitar anc bler. Era sin plaun internaziunal è il problem renconuschì. 193 stadis han suttascrit la convenziun da l'ONU davart la diversitad biologica. En quella appelleschan las Naziuns unidas a la publicitad mundiala da s'engaschar per la diversitad biologica.